Առավոտյան բարձրանալով Վարագա լեռը, հայտնվեցինք Վասպուրական թագավորության հոգևոր առաջնորդարան Վարագավանք վանական համալիրում: Ապա քաղաքի միջով անցնելիս կանգ առանք «Սասնա ծռեր» էպոսի Փոքր Մհերի ժայռափոր դռան մոտ: Այցելեցինք Վանա կատուների բուծարան: Վանա կատուները հայտնի են նրանով, որ ապրում են Վանի տարածքում և ունեն տարբեր գույների՝ կապույտ և դեղին աչքեր: Այնուհետև այցելեցինք Վանի բերդ (մ.թ.ա 9-րդ դար), ուր պահպանվել են Սարդուրի և Երևանի հիմնադիր Արգիշտի արքաների տպավորիչ սեպագրերը և դամբարանը: Հասանք Խոշաբի բերդ՝ Հայկաբերդ, որտեղ, ըստ ավանդության Հայկ Նահապետը սպանել է Բելին: Հաղթահարեցինք Սբ. Թովմաս բերդ տանող բարձունքը և եղանք Գևոշ գավառի Կարմրաքար եկեղեցում: Գիշերեցինք Վանի «Ռենոսանս» հյուրանոցում:
Սմբատ Պետրոսյան 